Sunnfjordinger gjorde
reint bord i «Årets lærling»
Gøran Standal (24) frå Førde og Espen Vasseth (20) frå Stongfjorden i Askvoll er begge kåra til «Årets lærling» i bygg- og anleggsbransjen på Vestlandet. Gøran er betongfaglærling hosBrødrene Ulveseth i Bergen, medan Espen er tømrar hos Åsen & Øvrelid i Førde.
Premien til vinnarane på 10.000 kronar og eit diplom vart overrakt av fagopplæringssjef Torbjørn Mjelstad i Hordaland fylkeskommune på eit arrangement i Bergen hos Entreprenørforeningen Bygg – Anlegg, Vestenfjelske avdeling. Dei to vann foran bergenserane Jan Olav Berentsen (26) på andreplass og Anders Gjesdal (19) som vart nummer tre. Dei utdannar seg begge i betongfaget som lærlingar hos henholdsvis Stoltz Entreprenør og NCC Anlegg.
Gøran Standal går læretida hos Brødrene Ulveseth og jobbar på boligprosjektet i Kronstadparken i Bergen. Han gjekk to-årig byggfagutdanning på Øyrane vidaregåande skule i Førde og etter militærtenesta flytta han til Bergen for å få lærekontrakt. Han skal ta fagprøve til sommaren.
Det er verksemdene som nominerar dei beste kandidatane til tevlinga om å verte «Årets lærling», og dei gir ei vurdering av faglege kvalifikasjonar og personlege eigenskapar. Betongbasen til Gøran såg tidleg hans talent og gode haldningar. Han fikk tidleg ansvar for store dekkstøpar, og utmåling og montering av sveiseplater og dekkantsikringar. I læretia har han ikkje hatt fravær og har levert særs gode resultat.
– Eg vart overraska og veldig glad for prisen, seier Gøran.
«Kanskje den beste vi har hatt»
Espen Vasseth gjekk også på Øyrane vidaregåande skule og tok fagprøva i august i år. Frå han vart lærling har han jobba hos Åsen & Øvrelid og har delteke i fleire bustadprosjekt. «Espen er kanskje den beste lærlingen vi har hatt nokon gong. Kombinasjonen av fagleg interesse, kompetanse og gode sosiale ferdigheiter gjer Espen til ein «vinnar» og ein framtidas mann som vi absolutt ønskjer å satse på», uttalar daglig leiar Finn Ove Øen i Åsen & Øvrelid. «Espen vil truleg få ein strålande karriere enten han fortset som fagarbeidar eller søkjer ytterligare utfordringar i faget.»
– Å verte «Årets lærling» gjer meg både stolt og takknemleg, seier Espen, som vurderar å gå vidare på teknisk fagskole eller ta høgskoleutdanning for å verte ingeniør.
Best blant over 300 lærlinger i bygg og anlegg
Kåringa av «Årets lærling» er gjort mellom vel 300 lærlingar i entreprenørbransjen i Hordaland og Sogn og Fjordane. Ein jury med representantar frå BYGGOPP i Hordaland og Sogn og Fjordane, fagopplæringskontoret i Hordaland fylkeskommune og Fellesforbundet tek den endelege avgjerda.
På andreplass kom Jan Olav Berentsen frå Bergen som er lærling hos Stoltz Entreprenør. For tida jobbar han på eit bustadprosjekt i Fyllingsdalen og skal ta fagprøve til sommaren. Det skal også Anders Gjesdal på tredjeplass. Han er TAF-lærling frå Knarvik vidaregåande skule og er tilsett hos NCC Construction, divisjon Anlegg. Han får no sin praktiske opplæring i samband med byggjinga av eit parkeringshus tilknytta Telenor-bygget ved Birkelandskrysset. Dei to fekk diplom og kvar sin sjekk på 5.000 kronar.
Rollemodeller
– Vinnarane i «Årets lærling» 2015 har i tillegg til å lære seg sine fag også tatt del i informasjonsaktivitetar på skulene for å fortelje om fagutdanninga. Dei er framifrå rollemodellar, seier opplæringsleiar Nils Arne Ødegård i BYGGOPP Sogn og Fjordane.
BYGGOPP legg til rette for opplæring innan bygg- og anleggsteknikkfaga og fylgjer opp lærlingane. BYGGOPP har 60 medlemsverksemder i Hordaland og 130 i Sogn og Fjordane.
– Vi takkar verksemdene som gjer ein særs god jobb for at lærlingar får praktisk trening i fagutdanninga, seier Jonny Olsen, opplæringsleiar i BYGGOPP Hordaland.